విక్రమ్ సహిదేవ్, సంధ్యా వశిష్ట ప్రధాన పాత్రలో నటించిన ‘అనకాపల్లి’ చిత్రం అక్టోబర్ 2న విడుదల కానుంది. ప్రమోషన్లలో భాగంగా నిర్మాత కాండ్రేగుల నాయుడు తాజాగా ఓ ఇంటర్వ్యూలో మాట్లాడుతూ.. గతంలో ప్రభాస్ ‘మిర్చి’ సినిమా టికెట్లు దొరక్క నిరాశ చెంది, అనకాపల్లిలోని థియేటర్‌నే కొనుగోలు చేశానని తెలిపారు. ఇప్పుడు అదే థియేటర్లలో తాను నిర్మించిన సినిమాను ప్రదర్శించడం సంతోషంగా ఉందన్నారు. త్రినాథరావు నక్కిన కథందించిన ఈ చిత్రాన్ని మైత్రి డిస్ట్రిబ్యూషన్స్ విడుదల చేస్తోంది.

పవన్ కల్యాణ్ బ్లాక్‌బస్టర్ చిత్రం ‘గబ్బర్ సింగ్’లో విలన్ అంత్యాక్షరి గ్యాంగ్ సభ్యుడిగా అలరించిన నటుడు రమేశ్ తీవ్ర అనారోగ్యంతో ఆసుపత్రిలో చేరారు. ప్రస్తుతం వైద్యుల నిరంతర పర్యవేక్షణలో చికిత్స పొందుతున్న ఆయన ఆరోగ్యం క్రమంగా మెరుగుపడుతోంది. కాగా, రమేశ్ పరిస్థితి తెలుసుకున్న ‘కాంచన’ ఫేమ్ నటుడు శ్రీమాన్ వెంటనే స్పందించి వైద్య ఖర్చుల నిమిత్తం రూ.25 వేల ఆర్థిక సాయం అందించారు. గతంలో వీరిద్దరూ కలిసి ఓ సినిమాలో నటించారు. ఆపదలో ఉన్న తోటి నటుడికి పెద్ద మనసుతో అండగా నిలిచిన శ్రీమాన్‌కు ‘గబ్బర్ సింగ్’ గ్యాంగ్ సభ్యులు ప్రత్యేక ధన్యవాదాలు తెలిపారు

గాంధీ జయంతి సందర్భంగా బాక్సాఫీస్ వద్ద తీవ్రమైన పోటీ నెలకొంది. అక్టోబర్ 2న ఫహాద్ ఫాజిల్ ‘డోంట్ ట్రబుల్ ది ట్రబుల్’, సందీప్ కిషన్ ‘సిగ్మా’, కీర్తి సురేష్ ‘డోరతి’లతో పాటు ‘అనకాపల్లి’, ‘తెల్ల కాగితం’ చిత్రాలు విడుదలవుతున్నాయి. ఫహాద్ సినిమాకు ఫ్యామిలీ టాక్, ‘సిగ్మా’కు యూత్ ఆధరణ కీలకంగా మారగా, ‘డోరతి’ ఇప్పటికే మిక్స్‌డ్ టాక్‌తో వస్తోంది. చిన్న చిత్రాలు సైతం తమ అదృష్టాన్ని పరీక్షించుకుంటుండగా, మరోవైపు ‘ది ప్యారడైజ్’ కూడా కొనసాగుతోంది. ఈ పోటీలో తొలి రోజు ఓపెనింగ్స్ కంటే, వీకెండ్ మౌత్ టాకే విజేతను నిర్ణయించనుంది.

బాలీవుడ్ భామ ఊర్వశి రౌతేలా, లాస్ ఏంజెల్స్‌‌కు చెందిన ఓ ఏఐ సంస్థపై న్యాయపోరాటానికి దిగారు. తన అనుమతి లేకుండా పేరు, ఫొటోలు, వీడియోలను వాణిజ్య ప్రయోజనాలకు వాడుకున్నారంటూ రూ.7,000 కోట్ల నష్టపరిహారం డిమాండ్ చేస్తూ లీగల్ నోటీసులు పంపించారు. దీనిపై ‘బాలీవుడ్.AI’ సీఈఓ షీరాజ్ హసన్ ఘాటుగా స్పందించారు. ఈ దావా పూర్తిగా హాస్యాస్పదమని కొట్టిపారేస్తూ.. “ముందు ఏఐపై అవగాహన పెంచుకో, నోటికొచ్చినట్లు మాట్లాడకు.. భవిష్యత్తు మొత్తం వర్చువల్ నటీనటులు, ఏఐ స్టార్స్‌దే” అంటూ కౌంటర్ ఇచ్చారు. ప్రస్తుతం ఈ పరిహారం వ్యవహారం సినీ, టెక్ వర్గాల్లో తీవ్ర సంచలనంగా మారింది.

ఎస్.ఎస్. రాజమౌళి గ్లోబల్ చిత్రం ‘ఆర్ఆర్ఆర్’ విడుదలై ఏళ్లు గడుస్తున్నా, “మెయిన్ హీరో ఎవరు?” అనే వివాదం మళ్లీ రాజుకుంది. ఎలన్ మస్క్‌కు చెందిన ‘గ్రోక్ AI’ బాట్‌ను నెటిజన్లు ప్రశ్నించగా, జూనియర్ ఎన్టీఆర్ మాత్రమే ప్రధాన కథానాయకుడని సమాధానమివ్వడం దుమారం రేపింది. దీనికితోడు తాజా ఈవెంట్‌లో తారక్ పులి ఎంట్రీ ఏవీని, రామ్ చరణ్ పులిని కొట్టే సీన్‌తో కొందరు మార్ఫింగ్ చేస్తూ ట్రోల్ చేయడంతో ఇరువర్గాల అభిమానుల మధ్య సోషల్ మీడియాలో భారీ యుద్ధం మొదలైంది. అయితే దర్శకుడు రాజమౌళి ఇద్దరికీ సమాన ప్రాధాన్యతనిచ్చి తీర్చిదిద్దారని, ఇలాంటి ఫ్యాన్ వార్స్ అనవసరమని విశ్లేషకులు చెబుతున్నారు.

తెలంగాణలో వరుసగా రెండుసార్లు అధికారంలోకి వచ్చిన కేసీఆర్ పార్టీ.. మూడోసారి గెలిచి హ్యాట్రిక్ సాధిస్తుందని ఆ పార్టీ నేతలు బలంగా నమ్మారు. కానీ ఎమ్మెల్యేలపై వ్యతిరేకత ఆ పార్టీకి ప్రతికూలంగా మారింది. 2023 చివర్లో జరిగిన ఎన్నికల్లో 39 స్థానాలకే పరిమితమైన బీఆర్ఎస్ అధికారాన్ని కోల్పోయి ప్రతిపక్ష పాత్రకు పరిమితం కావాల్సి వచ్చింది. లోక్ సభ ఎన్నికల్లో ఒక్క సీటు కూడా గెలవలేకపోయినప్పటికీ.. మున్సిపల్ ఎన్నికల్లో మాత్రం మంచి స్థానాలే గెలుచుకుంది.