విశాఖపట్నం తీరంలో విషాదం చోటుచేసుకుంది. సెలవు రోజు కావడంతో రుషికొండ ఐటీ హిల్స్ సమీపంలోని బీచ్‌కు వెళ్లిన ముగ్గురు విద్యార్థులు ప్రాణాలు కోల్పోయారు. ఎగసిపడ్డ అలల ఉధృతికి ఈత కొడుతున్న సూర్యప్రకాశ్, నితీశ్, ప్రశాంత్ అనే ముగ్గురు విద్యార్థులు నీటిలో కొట్టుకుపోయారు. గల్లైంతన పిల్లల కోసం అధికారులు గాలింపు చేపట్టారు. ప్రశాంత్ అనే విద్యార్థి మృతదేహం లభ్యమైంది. ఇంకా ఇద్దరి మృతదేహాల కోసం గాలింపు కొనసాగుతుంది. ఈ విషయం తెలుసుకున్న విద్యార్థుల తల్లిదండ్రులు, కుటుంబ సభ్యులు బీచ్ వద్దకు చేరుకుని కన్నీరుమున్నీరుగా విలపించారు.

ఏపీ ఎన్నికల్లో తన సర్వేతో సంచలనం సృష్టించిన కిరణ్ కొండేటీ మరో సంచలన నిర్ణయంతో ముందుకొచ్చారు. ఏకం పేరుతో తన రాజకీయాల్లోకి వస్తున్నట్టు ప్రకటించారు. ఏపీలో జరగబోయే పంచాయతీ, మున్సిపల్, కార్పొరేషన్ ఎన్నికల్లో పోరులో అభ్యర్థుల్ని నిలబెట్టబోతున్నట్టు వెల్లడించారు. అంతే కాదు ఏపీలో ప్రస్తుత పరిస్థితిపై సర్వే చేసినట్టు చెప్పారు. ప్రజలు ఉచిత పథకాలను కోరుకోవడం లేదని, మెరుగైన విద్య, వైద్యం, ఉద్యోగాలు, వసతులు కోరుకుంటున్నారని తన సర్వేలో తేలిందని చెప్పారు. ఈ సందర్భంగా సమస్యల మీద పోరాడే ప్రతి అభ్యర్థికి తాను అండగా నిలబడతానని ఆయన అన్నారు.

వర్షాలు లేక ఇబ్బందులు ఎదుర్కొంటున్న ఏపీ వాతావరణానికి సంబంధించిన ఒక వార్త వచ్చింది. బంగాళాఖాతంలో మరో అల్పపీడనం ఏర్పడనుందని, ఇది వాయుగుండంగా బలపడే అవకాశం ఉందని రాష్ట్ర విపత్తుల నిర్వహణ సంస్థ తెలిపింది.అధికారులు చెప్పిన ప్రకారం అక్టోబర్ 12వ తేదీన ఉపరితల ఆవర్తనం ఏర్పడి, దాని ప్రభావంతో అక్టోబర్ 13 నాటికి అదే ప్రాంతంలో అల్పపీడనంగా బలపడనుంది. అక్టోబర్ 15 నాటికి వాయుగుండంగా మారే అవకాశం కూడా ఉందని సంబంధిత అధికారులు తెలియజేశారు.