తోటి మహిళా ట్రైనీ ఐపీఎస్ అధికారిపై లైంగిక వేధింపులకు పాల్పడినట్లు ఆరోపణలు రావడంతో అరెస్టయిన ట్రైనీ ఐపీఎస్ అధికారి ఉదయ్ కృష్ణారెడ్డికి బిగ్ రిలీఫ్ లభించింది. ఈ కేసులో అరెస్ట్ అయిన ఉదయ్ కృష్ణారెడ్డికి ఉప్పర్‌పల్లి కోర్టు షరతులతో కూడిన బెయిల్ మంజూరు చేసింది. సుమారు 67 రోజుల పాటు జైలులో ఉన్న ఆయనకు తాజాగా ఊరట లభించింది. బెయిల్ మంజూరు సందర్భంగా ఉదయ్ కృష్ణారెడ్డికి కోర్టు కొన్ని షరతులు, నిబంధనలు విధించింది.

సిద్దిపేట జిల్లాలో లంచం తీసుకుంటూ పంచాయతీ సెక్రటరీ ఏసీబీ అధికారులకు అడ్డంగా బుక్కైంది. గ్రామ పంచాయతీలోనే రూ.15వేలు లంచం తీసుకుంటుండగా.. ఏసీబీ అధికారులు రెడ్ హ్యాండెడ్‌గా పట్టుకున్నారు. ఇళ్ల మ్యుటేషన్ కోసం రూ.20 వేలు లంచం డిమాండ్ చేయగా.. చివరికి రూ.15 వేలకు ఓకే చెప్పారు. కాంట్రాక్ట్ కారోబార్‌తో కలిసి పంచాయతీ కార్యదర్శి లంచం తీసుకుంటుండగా.. వారిద్దరినీ ఏసీబీ అధికారులు పట్టుకున్నారు. నిందితుల వద్ద నుంచి డబ్బు స్వాధీనం చేసుకుని అరెస్ట్ చేశారు.

తెలంగాణలో విద్యుత్ వినియోగదారులకు ట్రూఅప్ ఛార్జీల రూపంలో అదనపు భారం పడనుంది. రాష్ట్ర విద్యుత్ నియంత్రణ మండలి రూ.5,420.23 కోట్లను వ్యవసాయేతర వినియోగదారుల నుంచి వసూలు చేసేందుకు డిస్కంలకు అనుమతి ఇచ్చింది. మొదటి నెల యూనిట్‌కు 30 పైసలు, డిసెంబర్ నుంచి యూనిట్‌కు 50 పైసల చొప్పున అదనపు ఛార్జీలు వసూలు చేయనున్నారు. దక్షిణ తెలంగాణ డిస్కం పరిధిలో 29 నెలలు, ఉత్తర తెలంగాణ డిస్కం పరిధిలో 26 నెలల పాటు ఈ ప్రక్రియ కొనసాగుతుంది.

శంషాబాద్‌ శాతంరాయిలో యాక్సిస్‌ బ్యాంక్‌ ఏటీఎంలో రూ.30 లక్షలకు పైగా నగదు చోరీ కావడం చర్చనీయాంశంగా మారింది. ఏటీఎంలలో బలమైన వాల్ట్‌లు, సెన్సార్లు, అలారాలు, సీసీ కెమెరాలు, ఎలక్ట్రానిక్‌ నిఘా వంటి పలు భద్రతా వ్యవస్థలు ఉన్నప్పటికీ చోరీలు ఎలా జరుగుతున్నాయన్న ప్రశ్నలు తలెత్తుతున్నాయి. నిర్మానుష్య ప్రాంతాల్లోని ఏటీఎంలు, పాత భద్రతా వ్యవస్థలు, గార్డుల కొరత వంటి అంశాలు చోరీలకు కారణం అవుతున్నాయని నిపుణులు చెబుతున్నారు. ఆధునిక సర్వైలెన్స్‌ వ్యవస్థలతో భద్రతను పెంచుతున్నా.. వాటి నిరంతర నిర్వహణ కీలకంగా మారిందని అంటున్నారు.