పశ్చిమబెంగాల్లో ఆమ్ జనతా ఉన్నయన్ పార్టీ అధినేత, ఎమ్మెల్యే హుమాయున్ కబీర్ చేసిన వ్యాఖ్యలు రాజకీయ వివాదానికి తెరలేపాయి. సీఎం సువేందు అధికారి మరణాన్ని కోరతూ ప్రార్ధనలు చేస్తున్నట్టు ఆయన అన్న మాటలు పెద్ద దుమారాన్ని రేపాయి. దీనిపై బీజేపీ నాయకులు మండిపడుతున్నారు. కబీర్ కామెంట్స్‌పై సర్వత్రా విమర్శలు వస్తున్నాయి. దీంతో హుమాయున్ కబీర్ వెంటనే మాట మార్చారు. తాను సీఎం దిర్ఘాయువుగా ఉండాలని ప్రార్ధిస్తానని, ఆయన ప్ ప్రధాని అవ్వాలని కోరుకుంటున్నానని తెలిపారు. కానీ కబీర్ చేసిన కామెంట్స్‌పై బెర్హంపూర్ పోలీస్ స్టేషన్‌లో కబీర్‌పై FIR నమోదైనట్టు తెలుస్తుంది.

దేశంలోనే తొలి ఎల్ఎన్‌జీ రైలు పట్టాలు ఎక్కింది. కేంద్రమంత్రి అమిత్ షా ఈ రైలును ప్రారంభించారు. డీజిల్‌తో పాటు ఎల్ఎన్‌జీతో పనిచేసే ఈ రైలులో 1400 హెచ్‌పీ సామర్థ్యం ఉన్న రెండు డ్రైవింగ్ పవర్ కార్లను వినియోగిస్తున్నారు. ఈ టెక్నాలజీ ద్వారా డీజిల్ వినియోగాన్ని సుమారు 40 శాతం వరకు ఎల్ఎన్‌జీతో భర్తీ చేసే అవకాశం ఉందని రైల్వే అధికారులు తెలిపారు. ఇంధన ఖర్చు, ఉద్గారాలను తగ్గించడమే లక్ష్యంగా ఈ ప్రయోగాన్ని చేపట్టారు. రైల్వే ఆధునీకరణపై మాట్లాడటంతో పాటు కాంగ్రెస్‌పై అమిత్ షా రాజకీయ విమర్శలు చేశారు.

గతేడాది తమిళనాడులోని కరూర్‌లో టీవీకే నిర్వహించిన రాజకీయ సభలో జరిగిన తొక్కిసలాటలో 41 మంది ప్రాణాలు కోల్పోవడం తీవ్ర చర్చనీయాంశంగా మారిన సంగతి తెలిసిందే. ఈ విషాద ఘటనకు ఏడాది పూర్తైన సందర్భంగా తమిళనాడు సీఎం విజయ్ మృతులకు నివాళులు అర్పించారు. కరూర్ ప్రజలతో పాటు టీవీకే సభ్యులు ఇప్పటికీ మాటల్లో చెప్పలేని దుఃఖాన్ని అనుభవిస్తున్నారని పేర్కొన్నారు. ఆప్తులను కోల్పోయిన కుటుంబాలకు ఒకరికొకరు అండగా నిలవాలని పిలుపునిచ్చారు. ఇదిలా ఉండగా, బాధిత కుటుంబాలకు ప్రభుత్వ ఉద్యోగాలు కల్పించే అంశంపై సాగుతున్న న్యాయపరమైన ప్రక్రియ కూడా ప్రస్తుతం చర్చలో ఉంది.

తమిళనాడులో విజయ్ నేతృత్వంలోని టీవీకే ప్రభుత్వం ఆర్టీఐపై కీలక నిర్ణయాన్ని వెనక్కి తీసుకుంది. పబ్లిక్‌ విభాగాన్ని ఆర్టీఐ పరిధి నుంచి మినహాయిస్తూ జారీ చేసిన జీవోను రద్దు చేసింది. పబ్లిక్ విభాగాన్ని ఇంటెలిజెన్స్ అండ్ సెక్యూరిటీ ఆర్గనైజేషన్‌గా గుర్తిస్తూ మినహాయింపు ఇచ్చారు. దీంతో పోలీసు కాల్పులు, కస్టడీ మరణాలు, పోలీసుల చిత్రహింసలు, సామాజిక-కుల ఘర్షణలు, రాజకీయ, విద్యార్థి, రైతుల ఆందోళనలకు సంబంధించిన సమాచారంపై ఆర్టీఐ ద్వారా పారదర్శకతపై ప్రశ్నలు తలెత్తాయి. ప్రతిపక్షాలతోపాటు అధికార కూటమి పార్టీల నుంచి విమర్శలు వెల్లువెత్తడంతో తాజా ఉత్తర్వులతో పాత నిర్ణయాన్ని ఉపసంహరించుకుంది.