విజయ్ దేవరకొండ, రష్మిక జంటగా రాహుల్ సాంకృత్యన్ దర్శకత్వంలో తెరకెక్కుతున్న పీరియాడికల్ యాక్షన్ డ్రామా ‘రణబాలి’. ప్రమోషన్స్ విషయంలో మేకర్స్ వినూత్న ప్లాన్‌తో ముందుకొచ్చారు. బ్రిటీష్ ఇండియా కాలంలో జరిగిన యదార్థ సంఘటనల ఆధారంగా రూపొందుతున్న ఈ చిత్రం వెనుక ఉన్న నిజాలను వివరించడానికి ‘ది ట్రూత్ సిరీస్’ పేరుతో 4 ఎపిసోడ్ల ప్రత్యేక డాక్యుమెంటరీని విడుదల చేయనున్నారు. మైత్రీ మూవీ మేకర్స్ నిర్మిస్తున్న ఈ భారీ బడ్జెట్ చిత్రం దసరా కానుకగా అక్టోబర్ 16న థియేటర్లలోకి రానుంది.

నాని, శ్రీకాంత్ ఓదెల కాంబోలో వచ్చిన ‘ది ప్యారడైజ్’ చిత్రం థియేటర్లలో మిశ్రమ స్పందన తెచ్చుకుంది. అయినప్పటికీ బుక్‌మైషో, డిస్ట్రిక్ట్ యాప్‌లలో 33 లక్షల టిక్కెట్లు అమ్ముడైనట్లు మేకర్స్ ప్రకటించారు. అయితే బుక్‌మైషో యాప్‌లో రేటింగ్స్, రివ్యూస్ ఇచ్చే ఆప్షన్‌ను డిజేబుల్ చేయడం ఇప్పుడు చర్చనీయాంశంగా మారింది. ఫేక్ అకౌంట్లు, బోట్ల ద్వారా వస్తున్న ఉద్దేశపూర్వక నెగెటివ్ రేటింగ్‌లను నియంత్రించేందుకే ఈ నిర్ణయం తీసుకున్నారని ప్రచారం జరుగుతుండగా.. మరోవైపు నాని ఈ విమర్శలను, ట్రోల్స్‌ను పాజిటివ్‌గా స్వీకరిస్తూ పోస్ట్ పెట్టడం గమనార్హం.

వినాయక నిమజ్జనం పేరిట అర్ధరాత్రి వేళల్లో మోగుతున్న మితిమీరిన డీజే శబ్దాలు, ప్రజల ఇబ్బందులపై మాట్లాడిన నటి రేణూ దేశాయ్‌పై కొందరు నెటిజన్లు దారుణమైన ట్రోలింగ్‌కు దిగారు. దీనిపై ఆమె ఇన్‌స్టాగ్రామ్‌ వేదికగా తీవ్ర ఆవేదన వ్యక్తం చేస్తూ.. “చెవులు చిల్లులుపడే శబ్దాల వల్ల నరకం చూస్తున్న వృద్ధులు, పసిపిల్లలు, రోగుల తరఫున మాట్లాడినందుకు నన్ను నేరుగా ‘చచ్చిపో’ అని శపిస్తున్నారు” అంటూ మండిపడ్డారు. అసభ్యకర బూతులు తిడుతూ తన చావును కోరుకుంటున్నారని, ఇలాంటి వారికి తల్లిదండ్రులు ఎలాంటి సంస్కారాన్ని నేర్పించారో అర్థం కావడం లేదని అన్నారు.

రాష్ట్రంలో అధికారం కోల్పోయినప్పటికీ ప్రజల్లో మాజీ సీఎం కేసీఆర్‌పై అభిమానం చెక్కుచెదరలేదని బీఆర్‌ఎస్ వర్కింగ్ ప్రెసిడెంట్ కేటీఆర్ పేర్కొన్నారు. రాజేంద్రనగర్ కాంగ్రెస్ నేతలు బీఆర్‌ఎస్‌లో చేరిన సందర్భంగా ఆయన మాట్లాడుతూ.. ‘ది ప్యారడైజ్’ చిత్రంలో కేసీఆర్‌ను పోలిన పాత్ర కనిపించేది నాలుగు నిమిషాలే అయినప్పటికీ, థియేటర్లలో వచ్చిన రెస్పాన్స్ వేరే లెవల్‌లో ఉందని చెప్పారు. శాంతిభద్రతలు గాలికొదిలేసి డీజేలను బంద్ చేయడమే పనిగా పెట్టుకున్న కాంగ్రెస్ సర్కార్‌కు ఈ సినిమా మరో షాక్ ఇచ్చిందని ఎద్దేవా చేశారు. గడ్డిపోచ కూడా గడ్డపారలా మారి తిరగబడే నేల ఇదని హెచ్చరించిన కేటీఆర్, కేసీఆర్ స్థానం ప్రజల గుండెల్లో పదిలమని స్పష్టం చేశారు.

నేచురల్ స్టార్ నాని, శ్రీకాంత్ ఓదెల కాంబోలో వచ్చిన మాస్ పీరియడ్ యాక్షన్ డ్రామా ‘ది ప్యారడైజ్’ బాక్సాఫీస్ వద్ద కలెక్షన్ల సునామీ సృష్టిస్తోంది. ఈ చిత్రం మొదటి మూడు రోజుల్లోనే ప్రపంచవ్యాప్తంగా రూ.136 కోట్ల గ్రాస్ వసూలు చేసినట్లు నిర్మాణ సంస్థ ఎస్ఎల్‌వీ సినిమాస్ అధికారికంగా వెల్లడించింది. తొలి రోజున రూ.88 కోట్లు, రెండో రోజుతో కలిపి రూ.114 కోట్లు రాబట్టిన ఈ సినిమా, ఆదివారం నాటికి ఏకంగా రూ.136 కోట్ల మైలురాయిని అధిగమించింది. విమర్శకుల నుంచి మిక్స్‌డ్ టాక్ వ్యక్తమైనప్పటికీ, సింగిల్ స్క్రీన్లలో మాస్ ఆడియన్స్ బ్రహ్మరథం పడుతుండటంతో బాక్సాఫీస్ వద్ద ‘జాదల్ జమానా’ వసూళ్ల ప్రభంజనం కొనసాగుతోంది.