మేడారం సమ్మక్క-సారలమ్మ మినీ జాతర 2027 తేదీలు ఖరారు అయ్యాయి. ఫిబ్రవరి 17 నుంచి 20 వరకు 4 రోజుల పాటు మినీ జాతర నిర్వహించనున్నట్లు పూజారులు షెడ్యూల్ విడుదల చేశారు. ఫిబ్రవరి 17న సారలమ్మను గద్దెపైకి తీసుకురావడం, 18న సమ్మక్కను గద్దెపైకి తీసుకురావడం, 19న భక్తులు దర్శనాలు, మొక్కులు.. 20న జాతర ముగుస్తుంది. మహాజాతర లేని ఏడాదిలో జరిగే ఈ మినీ జాతరకు భారీ సంఖ్యలో భక్తులు వచ్చే అవకాశం ఉండటంతో అధికారులు దానికి సంబంధించిన ఏర్పాట్లు చేయనున్నారు.

వరల్డ్ టూరిజం డే సందర్భంగా సీఎం రేవంత్ రెడ్డి కీలక ప్రకటన చేశారు. తెలంగాణలోని చారిత్రక కట్టడాలు, దేవాలయాలు, కోటలు, జలపాతాలు, అడవులు, వన్యప్రాణి ప్రాంతాలు, జానపద కళలు, పండుగలను ప్రపంచ పర్యాటక పటంలో మరింతగా పరిచయం చేయాలని తమ ప్రభుత్వం లక్ష్యంగా పెట్టుకుందని చెప్పారు. రామప్ప, వరంగల్, యాదాద్రి, భద్రాద్రి, అలంపూర్, మేడారం, హైదరాబాద్‌ హెరిటేజ్‌ ప్రాంతాల అభివృద్ధిపై దృష్టి సారిస్తున్నట్లు తెలిపారు. టూరిజం పాలసీ 2025-30 ద్వారా పెట్టుబడులను ఆకర్షిస్తూ ఎకో, టెంపుల్, మెడికల్, హెరిటేజ్, అడ్వెంచర్ టూరిజాన్ని ప్రోత్సహిస్తామని పేర్కొన్నారు.

తెలంగాణలో ఏళ్ల తరబడి పెండింగ్‌లో ఉన్న అర్బన్ ల్యాండ్ సీలింగ్ దరఖాస్తుల పరిష్కారానికి ప్రభుత్వం చర్యలు చేపట్టింది. జీవో నెం.455, 456, 747, 92 కింద ఉన్న దరఖాస్తులను పరిశీలించి అర్హమైన కేసులను నిబంధనల ప్రకారం క్రమబద్ధీకరించాలని అధికారులను ఆదేశించినట్లు మంత్రి పొంగులేటి శ్రీనివాసరెడ్డి తెలిపారు. మరోవైపు 22A భూముల సమస్యల పరిష్కారంపైనా ప్రభుత్వం దృష్టి సారించింది. జీవో 118, 76కు అనుగుణంగా చర్యలు చేపట్టామని, మిగిలిన సమస్యలను కూడా వేగంగా పరిష్కరిస్తామని వెల్లడించింది.