పాకిస్థాన్‌లో తయారైన అనధికారిక కాస్మోటిక్స్ హైదరాబాద్‌లో విక్రయించడం తీవ్ర కలకలం రేపుతోంది. టాస్క్‌ఫోర్స్ పోలీసులు నిర్వహించిన సోదాల్లో సుమారు రూ.7 లక్షల విలువైన క్రీములు, సబ్బులు, ఇతర బ్యూటీ ఉత్పత్తులు స్వాధీనం చేసుకున్నారు. వీటికి భారత్‌లోకి దిగుమతి చేసుకునేందుకు అవసరమైన రిజిస్ట్రేషన్ లేదని అధికారులు తెలిపారు. ఈ పాకిస్థాన్ కాస్మోటిక్స్ సరఫరా వెనుక ముంబైకి చెందిన డీలర్ ఉండొచ్చన్న అనుమానంతో పోలీసులు దర్యాప్తు చేస్తున్నారు.

తెలంగాణ కేబినెట్ కీలక నిర్ణయాలకు ఆమోదం తెలిపింది. ఉద్యోగులు, రైతులు, విద్యుత్, వర్షాభావ పరిస్థితులు, డిజిటల్ మీడియా సహా పలు అంశాలపై కీలక నిర్ణయాలు తీసుకున్నారు. 2024 నుంచి పెండింగ్‌లో ఉన్న 2 డీఏలకు మంత్రివర్గం ఆమోదం తెలిపింది. డీఏల అమలుతో రాష్ట్ర ఖజానాపై ఏటా సుమారు రూ.2,500 కోట్ల భారం పడనుంది. రాష్ట్రంలో 17 శాతం వర్షపాతం లోటు, 235 మండలాల్లో వర్షాభావ పరిస్థితులపై కేబినెట్ చర్చించింది. కరువు సాయంపై కేంద్రాన్ని కోరాలని, అఖిలపక్ష సమావేశం నిర్వహించాలని నిర్ణయించింది. 65 లక్షల టన్నుల ధాన్యం కొనుగోలు, 7,800 మెగావాట్ల కొత్త విద్యుత్ సామర్థ్యం, కోహెడ ఫ్రూట్ మార్కెట్, 10 ఈపీసీ ప్రాజెక్టులపై కూడా నిర్ణయాలు తీసుకుంది.

ఖైరతాబాద్ అసెంబ్లీ ఉపఎన్నికపై కీలక పరిణామం చోటుచేసుకుంది. కాంగ్రెస్ నేత విజయారెడ్డి దాఖలు చేసిన ఎన్నికల పిటిషన్‌పై తుది తీర్పు వచ్చే వరకు ఉపఎన్నిక నోటిఫికేషన్ జారీ చేయబోమని ఎన్నికల సంఘం.. హైకోర్టుకు తెలిపింది. 2023 అసెంబ్లీ ఎన్నికల్లో దానం నాగేందర్ ఖైరతాబాద్ నుంచి విజయం సాధించగా.. విజయారెడ్డి రెండో స్థానంలో నిలిచారు. దానం నాగేందర్ అనర్హతకు గురై సీటు ఖాళీ కావడంతో ఉపఎన్నిక అనివార్యమైంది. అయితే విజయారెడ్డి పిటిషన్‌తో ఇప్పుడు ఎన్నికల ప్రక్రియకు తాత్కాలికంగా బ్రేక్ పడింది. హైకోర్టు తుది తీర్పు తర్వాతే తదుపరి పరిణామాలపై స్పష్టత వచ్చే అవకాశం ఉంది.

ఎల్‌నినో ప్రభావం నేపథ్యంలో దేశవ్యాప్తంగా వాతావరణ పరిస్థితుల్లో మార్పులు కనిపించే అవకాశం ఉందని ఐఎండీ వెల్లడించింది. అక్టోబర్‌లో గరిష్ఠ, కనిష్ఠ ఉష్ణోగ్రతలు సాధారణం కంటే ఎక్కువగా నమోదయ్యే అవకాశం ఉండటంతో ఈ ఏడాది చలి తీవ్రత తక్కువగా ఉండొచ్చని అంచనా వేసింది. అక్టోబర్ నుంచి డిసెంబర్ వరకు వర్షపాతం కూడా సాధారణం కంటే తక్కువగా ఉండే అవకాశముంది. తెలంగాణలో 615.5 మిల్లీమీటర్ల వర్షపాతంతో 17 శాతం లోటు నమోదైంది.