సిద్దిపేటలో ట్రాన్స్‌జెండర్‌ సునంద ఆత్మహత్య చేసుకోవడం తీవ్ర విషాదం నింపింది. కొన్నేళ్ల క్రితం అజయ్‌కుమార్‌ను ప్రేమించి వివాహం చేసుకున్న ఆమెకు ఆ తర్వాత భర్తతో మనస్పర్థలు ఏర్పడినట్లు సంబంధిత వర్గాలు తెలిపాయి. తన భర్త మరో మహిళతో సన్నిహితంగా ఉంటున్నారనే ఆరోపణలతో ఇద్దరి మధ్య తరచూ గొడవలు జరిగేవని చెప్పారు. ఇటీవల ఇద్దరూ విడివిడిగా ఉండేందుకు బాండ్‌ పేపర్‌ రాసుకున్నట్లు సమాచారం. ఈ నేపథ్యంలో సునంద ఇంట్లో ఉరి వేసుకుని మృతి చెందారు.

టీజీఎస్ఆర్టీసీ కార్మిక సంఘం ఎన్నికల్లో రాజకీయ పార్టీల మద్దతు అంశం చర్చనీయాంశంగా మారిన వేళ.. టీపీసీసీ చీఫ్ కీలక వ్యాఖ్యలు చేశారు. తెలంగాణ ఆర్టీసీ వర్కర్స్‌ యూనియన్‌కు కాంగ్రెస్‌ పార్టీ పూర్తి మద్దతు ప్రకటిస్తున్నట్లు మహేశ్‌ కుమార్‌ గౌడ్‌ వెల్లడించారు. ఎన్నికల సమన్వయం బొంతు రామ్మోహన్‌కు బాధ్యతలు అప్పగించారు. మరోవైపు పలు కార్మిక సంఘాలు ఎన్నికల బరిలో నిలుస్తున్నాయి. అక్టోబర్‌ 9న రహస్య బ్యాలెట్‌ ద్వారా పోలింగ్‌ జరగనుండగా.. అక్టోబర్‌ 17న ఫలితాలు ప్రకటించనున్నారు.

హైదరాబాద్‌ నగర పర్యాటకులకు త్వరలో ఓపెన్‌ టాప్‌ ఎలక్ట్రిక్‌ డబుల్‌ డెక్కర్‌ బస్సులు అందుబాటులోకి రానున్నాయి. తెలంగాణ టూరిజం డెవలప్‌మెంట్‌ కార్పొరేషన్‌ కొత్త బస్సులను సమకూర్చుకునేందుకు ప్రతిపాదనలు ఆహ్వానించింది. బస్సులోని పైఅంతస్తు పూర్తిగా ఓపెన్‌గా.. కింది డెక్‌ ఏసీ సౌకర్యంతో ఉండేలా వీటిని రూపొందించనున్నారు. మరోవైపు హెచ్ఎండీఏ వద్ద ఉన్న 6 ఎలక్ట్రిక్‌ డబుల్‌ డెక్కర్‌ బస్సులను కూడా టూరిజం శాఖ పరిధిలోకి తీసుకొచ్చి నగరంలోని ప్రముఖ పర్యాటక ప్రాంతాల్లో నడిపే యోచన ఉంది. దీంతో పాత డబుల్‌ డెక్కర్‌ జ్ఞాపకాలకు ఆధునిక టూరిజం రూపం రానుంది.

హైదరాబాద్‌లో గణేశ్‌ నిమజ్జన శోభాయాత్రలు కొనసాగుతున్న సమయంలో శుక్రవారం ప్రార్థనలు కూడా ఉండటంతో చార్మినార్‌ పరిసరాల్లో పోలీసులు భద్రతను మరింత పెంచారు. కీలక ప్రాంతాల్లో బాంబ్‌ డిటెక్షన్‌ బృందాలు, ప్రత్యేక పోలీసు బలగాలతో తనిఖీలు చేపట్టారు. అనుమానాస్పద వ్యక్తులు, వస్తువులపై నిఘా పెట్టడంతో పాటు కొన్ని దుకాణాలను మూసివేయించారు. నగరవ్యాప్తంగా వేలాది మంది పోలీసులు, వేల సంఖ్యలో సీసీ కెమెరాలు, డ్రోన్లతో నిఘా కొనసాగుతోంది. నిమజ్జన మార్గాల్లో ట్రాఫిక్‌ ఆంక్షలు అమల్లో ఉండగా, శోభాయాత్రలు ప్రశాంతంగా జరిగేలా పోలీసులు చర్యలు చేపట్టారు.

ఎమ్మెల్యే అరికెపూడి గాంధీకి ఈడీ సమన్లు జారీ చేసింది. సాహితి ఇన్‌ఫ్రాటెక్ వెంచర్స్ ఇండియా ప్రైవేట్ లిమిటెడ్‌కు సంబంధించిన మనీలాండరింగ్ కేసులో విచారణకు హాజరుకావాలని ఆదేశించింది. సాహితి ఇన్‌ఫ్రా నుంచి అరికెపూడి గాంధీకి సంబంధించిన బ్యాంకు అకౌంట్లలోకి సుమారు రూ.2.1 కోట్ల నిధులు బదిలీ అయినట్లు దర్యాప్తులో ఈడీ గుర్తించింది. ఈ లావాదేవీల స్వభావం, ఉద్దేశం, వాటికి చట్టబద్ధమైన వ్యాపార కారణాలు ఉన్నాయా అనే అంశాలను అధికారులు పరిశీలిస్తున్నారు.