గచ్చిబౌలిలోని హోటల్‌లో విదేశీ యువతులతో వ్యభిచారం నిర్వహిస్తున్న ముఠా ఆటను పోలీసులు కట్టించారు. ఈ నేపథ్యంలోనే ముగ్గురు యువకులు.. ఉజ్బెకిస్థాన్‌కు చెందిన ముగ్గురు మహిళలను అదుపులోకి తీసుకున్నట్లు పోలీసులు తెలిపారు. ఘటనాస్థలం నుంచి రూ.13 వేల నగదు, రెండు మొబైల్‌ ఫోన్లు, స్వాధీనం చేసుకున్నట్లు వెల్లడించారు. విదేశీ మహిళల పాస్‌పోర్టులు, వీసాలు చెల్లుబాటులో ఉన్నట్లు పోలీసులు గుర్తించారు. ఈ వ్యవహారం వెనుక మరెవరైనా ఉన్నారా, మహిళలను హైదరాబాద్‌కు ఎవరు తీసుకొచ్చారు అనే కోణాల్లో దర్యాప్తు కొనసాగుతోంది.

ఖైరతాబాద్ ఉపఎన్నికపై కాంగ్రెస్ నాయకురాలు విజయారెడ్డి హైకోర్టును ఆశ్రయించారు. 2024లో దానం నాగేందర్ ఎన్నికను సవాల్ చేస్తూ తాను దాఖలు చేసిన పిటిషన్‌పై తుది తీర్పు వెలువడే వరకు ఉపఎన్నిక నోటిఫికేషన్ జారీ చేయకుండా ఈసీని ఆదేశించాలని కోరారు. దానం నాగేందర్ ఎన్నికల అఫిడవిట్‌లో కుటుంబ ఆస్తుల వివరాలను పూర్తిగా వెల్లడించలేదని ఆరోపిస్తూ విజయారెడ్డి గతంలో పిటిషన్ వేశారు. ఇప్పుడు విజయారెడ్డి పిటిషన్‌పై హైకోర్టు ఎలాంటి నిర్ణయం తీసుకుంటుందన్నది కీలకంగా మారింది.

ఎస్ఐఆర్, ఓట్ల తొలగింపు వ్యవహారంపై దానం నాగేందర్ తీవ్రస్థాయిలో విమర్శలు చేశారు. ఖైరతాబాద్ నియోజకవర్గంలో సుమారు 20 వేల ఓట్లు తొలగించారని ఆరోపించారు. చాలాకాలంగా స్థానికంగా నివసిస్తున్న, గత ఎన్నికల్లో ఓటు వేసిన వారి పేర్లను కూడా తొలగించారని పేర్కొన్నారు. ఓట్లను తక్షణమే పునరుద్ధరించాలని, బాధ్యులపై క్రిమినల్ చర్యలు తీసుకోవాలని డిమాండ్ చేశారు. ఈసీ తన వైఖరి మార్చుకోకపోతే ఆందోళనలు తీవ్రతరం చేస్తామని హెచ్చరించారు. ఈ క్రమంలో ఈసీ కార్యాలయాన్ని, హైదరాబాద్‌ను తగలబెడతామని హెచ్చరించారు.

Osmania University Ganja Plant: ఉస్మానియా యూనివర్సిటీ క్యాంపస్‌లో గంజాయి మొక్క కనిపించడం కలకలం రేపుతోంది. మొక్క సహజంగా మొలిచిందా? ఎవరైనా నాటారా? గంజాయి సిగరెట్‌ లేదా విత్తనాల ద్వారా మొలకెత్తిందా? అనే అనుమానాలు వ్యక్తమవుతున్నాయి. క్యాంపస్‌లో మరెక్కడైనా ఇలాంటి మొక్కలు ఉన్నాయా అనే అంశంపై కూడా ప్రశ్నలు తలెత్తుతున్నాయి. యూనివర్సిటీ అధికారులు పూర్తిస్థాయి తనిఖీలు నిర్వహించాలని, పోలీసులు విచారణ చేపట్టి వాస్తవాలను వెల్లడించాలని విద్యార్థి సంఘం నేతలు కోరుతున్నారు. విద్యార్థుల భవిష్యత్తు, క్యాంపస్‌ వాతావరణాన్ని దృష్టిలో ఉంచుకుని తక్షణ చర్యలు తీసుకోవాలని డిమాండ్ చేస్తున్నారు.

హైదరాబాద్‌ పరిధిలోని సైబరాబాద్‌ నగరపాలక సంస్థ ప్రజలకు కీలక అవకాశం కల్పించింది. కాలనీలు, బస్తీల్లో నెలకొన్న పౌర సమస్యలను నేరుగా అధికారుల దృష్టికి తీసుకెళ్లి, వాటికి పరిష్కారం పొందేలా వినూత్న కార్యక్రమాన్ని ప్రారంభించింది. క్షేత్రస్థాయి పర్యటనల్లో తన దృష్టికి రాని సమస్యలను తెలుసుకునేందుకు సీఎంసీ కమిషనర్‌ జి.సృజన 90634 21347 వాట్సాప్‌ ద్వారా ఫిర్యాదులు స్వీకరించాలని నిర్ణయించారు. అక్టోబర్‌ 1 నుంచి 7వ తేదీ వరకు ప్రజలు తమ సమస్యలను వాట్సాప్‌ ద్వారా తెలియజేయవచ్చని ప్రకటించారు. సమస్యకు సంబంధించిన వివరాలు, ఫొటోలు, వీడియోలు, గూగుల్‌ లొకేషన్‌ పంపించాలని సూచించారు.