తెలంగాణలో ఆటో ప్రయాణికులకు కొత్త ఛార్జీలు అమల్లోకి వచ్చాయి. దాదాపు 12 ఏళ్ల తర్వాత రాష్ట్ర ప్రభుత్వం ఆటో మీటర్ రేట్లను సవరించింది. కొత్త నిబంధనల ప్రకారం తొలి 1.6 కిలోమీటర్లకు కనీస ఛార్జీ రూ.30గా, ఆ తర్వాత ప్రతి కిలోమీటర్‌కు రూ.14గా నిర్ణయించారు. డిటెన్షన్ ఛార్జీ నిమిషానికి 75 పైసలకు పెరిగింది. నిబంధనలకు లోబడి అదనపు లగేజీకి ఒక్కో ప్యాకేజీకి 50 పైసలు వసూలు చేయనున్నారు. రాత్రి 11 గంటల నుంచి ఉదయం 5 గంటల వరకు సాధారణ ఛార్జీకి 1.5 రెట్లు చెల్లించాలి. కొత్త రేట్లకు అనుగుణంగా మీటర్లు సవరించుకునేందుకు ఆటో డ్రైవర్లకు 3 నెలల గడువు ఇచ్చారు.

సిరిసిల్లలో సీఎం రేవంత్‌రెడ్డి నిర్వహించిన సభకు కౌంటర్‌గా కొడంగల్‌లో బీఆర్‌ఎస్ భారీ సభ నిర్వహించనున్నట్లు మాజీమంత్రి తలసాని శ్రీనివాస్ యాదవ్ ప్రకటించారు. సిద్దిపేటలో సీఎం సభ తర్వాత కొడంగల్‌లో తమ పార్టీ సభ ఉంటుందని ఆయన తెలిపారు. కొడంగల్ సభతో రేవంత్‌రెడ్డికి చెమటలు పట్టిస్తామని వ్యాఖ్యానించారు. సిరిసిల్లలో బలప్రదర్శన అవసరం లేదని విమర్శించారు. ఇదే సమయంలో ఖైరతాబాద్ ఉపఎన్నికపై కూడా తలసాని స్పందిస్తూ బీఆర్‌ఎస్ విజయం సాధిస్తుందని ధీమా వ్యక్తం చేశారు.

దిల్‌సుఖ్‌నగర్‌ సంతోషిమాత ఆలయంలో తీవ్ర ఉద్రిక్తత నెలకొంది. ఆలయంలోకి ప్రవేశించిన ఓ వ్యక్తి పూజారిపై కర్రతో దాడికి ప్రయత్నించడంతో పాటు అమ్మవారి విగ్రహంపై కూడా కర్రతో దాడి చేశాడు. ఈ ఘటనను గమనించిన భక్తులు వెంటనే అతడిని అడ్డుకుని పట్టుకున్నారు. అనంతరం చైతన్యపురి పోలీసులకు సమాచారం అందించడంతో పోలీసులు సంఘటనా స్థలానికి చేరుకుని నిందితుడిని అదుపులోకి తీసుకున్నారు. ఘటనపై కేసు నమోదు చేసి దర్యాప్తు చేస్తున్నారు. ఆలయంలోని సీసీటీవీలో ఈ ఘటన దృశ్యాలు రికార్డ్ అయ్యాయి. దీనిపై హిందూ సంఘాలు తీవ్ర ఆగ్రహం వ్యక్తం చేస్తున్నాయి.

హైదరాబాద్ సిటీ పోలీస్ కమిషనరేట్‌లో ప్రభుత్వం భారీ పునర్వ్యవస్థీకరణ చేపట్టింది. హోంశాఖ జారీ చేసిన కొత్త జీవో ప్రకారం నగరంలోని మొత్తం 76 ప్రాంతాలకు సంబంధించి జోన్లు, డివిజన్లు, పోలీస్ స్టేషన్ల పరిధుల్లో మార్పులు చేశారు. ఆర్‌జీఐఏ పోలీస్ స్టేషన్ పేరును శంషాబాద్ పీఎస్‌గా.. ఆర్‌జీఐఏ డివిజన్‌ను శంషాబాద్ డివిజన్‌గా మార్చారు. చిక్కడపల్లి డివిజన్ కాచిగూడగా.. సంతోష్‌నగర్ డివిజన్ ఛత్రినాకగా మారింది. బడంగ్‌పేట్ పీఎస్‌ను రద్దు చేసి దాని పరిధిలోని ప్రాంతాలను ఇతర స్టేషన్లకు బదిలీ చేశారు. ట్రాఫిక్, ఉమెన్ సేఫ్టీ, జోనల్ సైబర్ సెల్‌ల పరిధుల్లోనూ మార్పులు చేశారు.