Aadarsha Kutumbam Postponed: వెంకటేష్, త్రివిక్రమ్ కాంబినేషన్‌లో రూపొందుతున్న ‘ఆదర్శ కుటుంబం హౌస్‌ నెం.47’ చిత్రం మరోసారి వాయిదా పడింది. అక్టోబర్ 9న రావాల్సిన ఈ సినిమా విడుదల ఆలస్యం కానుందని నిర్మాత నాగవంశీ ప్రెస్ మీట్‌ పెట్టి మరీ ధ్రువీకరించారు. పోస్ట్ ప్రొడక్షన్ పనులు పూర్తికాకపోవడంతో ఈ నిర్ణయం తీసుకున్నట్లు ఆయన వెల్లడించారు. నాలుగైదు రోజుల ముందు ఈ విషయం చెప్పినందుకు క్షమించమని కోరారు. ఎప్పుడొచ్చినా ఈ సినిమా వెంకీ ఫ్యాన్స్ కాలర్ ఎగరేసేలా ఉంటుందని నాగవంశీ అన్నారు.

2026 క్రిస్మస్ బాక్సాఫీస్ రేసు ఆసక్తికరంగా మారింది. ఇప్పటికే అక్కినేని నాగార్జున ‘కింగ్ 100’, నందమూరి బాలకృష్ణ ‘దాదా’ చిత్రాలు విడుదలకు సిద్ధమవుతుండగా.. ఇప్పుడు యువ హీరో కిరణ్ అబ్బవరం కూడా బరిలో దిగుతున్నారు. ఆయన స్వీయ దర్శకత్వంలో తెరకెక్కిస్తున్న ‘రియాలిటీ’ చిత్రాన్ని డిసెంబర్ 25న రిలీజ్ చేయనున్నట్లు అధికారికంగా ప్రకటించారు. సీనియర్ స్టార్లతో పోటీకి రెడీ అయిన కిరణ్ అబ్బవరం.. కాస్త రిస్క్ చేస్తున్నారేమో అనే అభిప్రాయాలు వ్యక్తం అవుతున్నాయి.

నటసింహం నందమూరి బాలకృష్ణ, స్టార్ డైరెక్టర్ కొరటాల శివ కాంబినేషన్‌లో తెరకెక్కనున్న ప్రతిష్టాత్మక ప్రాజెక్ట్‌పై టాలీవుడ్‌లో సరికొత్త సంచలనం మొదలైంది. శ్రీలక్ష్మి వెంకటేశ్వర సినిమాస్ బ్యానర్‌పై సుధాకర్ చెరుకూరి నిర్మించనున్న ఈ సినిమాలో బాలయ్యకు దీటైన ప్రధాన ప్రతినాయకుడి పాత్ర కోసం సీనియర్ హీరో, ‘యాంగ్రీ మ్యాన్’ డాక్టర్ రాజశేఖర్‌ను సంప్రదించినట్లు ఫిలింనగర్‌లో జోరుగా ప్రచారం సాగుతోంది. ఈ చిత్రంలో బాలకృష్ణ తండ్రీకొడుకులుగా ద్విపాత్రాభినయం చేయనున్నారని సమాచారం. మాస్ హీరో బాలయ్య, విలక్షణ నటుడు రాజశేఖర్ ముఖాముఖి తలపడే సన్నివేశాలు వెండితెరపై హై-వోల్టేజ్ అనుభూతిని అందిస్తాయని భావిస్తున్నారు.

కోలీవుడ్ నటుడు సూరి, తెలుగు యువ నటుడు సుహాస్ ప్రధాన పాత్రల్లో తెరకెక్కిన సస్పెన్స్ యాక్షన్ డ్రామా ‘మండాడి’ త్వరలోనే డిజిటల్ తెరపై సందడి చేయనుంది. సముద్రపు నేపథ్యం, సంప్రదాయ పడవల పందెం చుట్టూ సాగే ఈ చిత్రం థియేటర్లలో రూ.140 కోట్లకు పైగా గ్రాస్ వసూళ్లతో ఘన విజయం సాధించింది.తాజాగా ఈ సినిమా డిజిటల్ హక్కులను ప్రముఖ ఓటీటీ సంస్థ నెట్‌ఫ్లిక్స్ సొంతం చేసుకుంది. అక్టోబర్ 8 లేదా 9 నుంచి తెలుగు, తమిళం, హిందీ, కన్నడ, మలయాళ భాషల్లో స్ట్రీమింగ్ కానున్నట్లు తెలుస్తోంది. నెల రోజులు గడవకముందే ఇంతటి భారీ హిట్ సినిమా ఓటీటీ బాట పట్టడం సినీ అభిమానులను ఆశ్చర్యపరుస్తోంది.

బాలీవుడ్‌లో ఇటీవల జరిగిన ఐటీ సోదాల నేపథ్యంలో తనపై వస్తున్న నిరాధార కథనాలపై ప్రముఖ నటి రకుల్ ప్రీత్ సింగ్ తీవ్రంగా మండిపడ్డారు. తనకు ఎవరూ ఎలాంటి ఆస్తులను బహుమతిగా ఇవ్వలేదని, దేశంలోగానీ విదేశాల్లోగానీ తనకు ఎటువంటి బినామీ ఆస్తులు లేవని స్పష్టం చేశారు. అలాగే అక్రమ విదేశీ లావాదేవీలతో తనకు ఎలాంటి ప్రమేయం లేదని తేల్చిచెప్పారు. ఆర్మీ కుటుంబం నుంచి వచ్చిన తాను 20 ఏళ్ల వయస్సు నుంచే నిజాయితీగా పన్నులు చెల్లిస్తున్నానని తెలిపారు. రేటింగుల కోసం వాస్తవాలు నిర్ధారించుకోకుండా ఒకరి ప్రతిష్టను దిగజార్చేలా వార్తలు రాయడం సరికాదని, తప్పుడు కథనాలను ప్రచురించిన సంస్థలు వెంటనే వాటిని వెనక్కి తీసుకోవాలని డిమాండ్ చేశారు