రాష్ట్రంలో నిర్మాణంలో ఉన్న ప్రధాన ప్రభుత్వ ఆసుపత్రుల పనులను వేగవంతం చేయాలని సీఎం రేవంత్ రెడ్డి అధికారులను ఆదేశించారు. ఉస్మానియా, వరంగల్ సూపర్ స్పెషాలిటీ, ఎల్బీనగర్, అల్వాల్ టిమ్స్ ఆసుపత్రుల నిర్మాణ పురోగతిని సమీక్షించిన సీఎం.. ఆసుపత్రులు పూర్తయ్యే సమయానికి డాక్టర్లు, నర్సులు, ఇతర సిబ్బంది అందుబాటులో ఉండేలా నియామక ప్రక్రియను ముందుగానే ప్రారంభించాలని సూచించారు. అత్యాధునిక వైద్య పరికరాల కొనుగోళ్లను కూడా వేగవంతం చేయాలని చెప్పారు.

ముస్లిం యువతను ఉద్దేశించి చేసిన ఎంఐఎం ఎమ్మెల్యే అక్బరుద్దీన్ ఓవైసీ వ్యాఖ్యలు తీవ్ర చర్చనీయాంశంగా మారాయి. తాను 12వ తరగతి వరకు మాత్రమే చదువుకున్నప్పటికీ అసెంబ్లీలో భయపడకుండా తన అభిప్రాయాలను చెబుతానని.. సీఎంలను కూడా స్పందించేలా మాట్లాడ,mతానని పేర్కొన్నారు. జెన్‌జీ యువత కూడా తమ అభిప్రాయాలను ధైర్యంగా చెప్పాలని సూచించారు. హిజాబ్ మహిళల ఇష్టమని.. విద్యను అభ్యసించి జీవిత లక్ష్యాలను సాధించాలని సూచించారు. ఇక గడ్డం తీయాలా లేదా అని వారి ఇష్టమని పేర్కొన్నారు.

ఒకప్పుడు కరువు, వలసలకు నిలయమైన పాలమూరు (దక్షిణ తెలంగాణ) ప్రాంతం సాగునీటి ప్రాజెక్టులు, జిల్లా పునర్వ్యవస్థీకరణతో ప్రగతి పథంలోకి అడుగుపెట్టింది. పాలమూరు-రంగారెడ్డి, కల్వకుర్తి, భీమా వంటి ప్రాజెక్టులు సాగునీటి లభ్యతను పెంచగా; మహబూబ్‌నగర్, నారాయణపేట, వనపర్తి, జోగులాంబ గద్వాల, నాగర్‌కర్నూల్ జిల్లాలు తమ ప్రాంతీయ బలాలతో ఆర్థికంగా బలపడుతున్నాయి. హైదరాబాద్‌కు సమీపంలో ఉండడం వల్ల లాజిస్టిక్స్, పరిశ్రమలు, సేవా రంగాల్లో కొత్త అవకాశాలు లభిస్తున్నాయి. ఉపాధి కల్పన, వ్యవసాయ విలువ జోడింపు, సమగ్ర అభివృద్ధి సాధించడమే లక్ష్యంగా పాలమూరు కరువు నుంచి శాశ్వత ఆర్థిక స్వావలంబన వైపు వేగంగా వేగంగా అడుగులు వేస్తోంది.