జొమాటో డెలివరీ ఏజెంట్‌పై ఓ కస్టమర్, అతడి భార్య దాడికి పాల్పడ్డారు. వారు పెట్టిన ఫుడ్ ఆర్డర్‌ను అనుకున్న సమయానికి తీసుకురాలేదని వాగ్వాదానికి దిగిన ఈ జంట.. అనంతరం చేయి చేసుకున్నారు. అయితే, కస్టమర్ బుకింగ్ సమయంలో యాప్ లొకేషన్ తప్పుగా ఉండటంతో.. సరైన అడ్రస్‌ కనుక్కుని వెళ్లేసరికి కొన్ని నిమిషాలు జాప్యం జరిగింది. దీంతో డెలివరీ ఆలస్యంపై ఏజెంట్, కస్టమర్‌కు మాటామాటా పెరిగి గొడవకు దారితీసింది. వివాదం మరింత ముదరడంతో కస్టమర్, అతడి భార్య కలిసి దాడికి పాల్పడ్డాడు.

తెలంగాణలో సీనియర్‌ సిటిజన్లకు ఆర్టీసీ బస్సుల్లో ఉచిత ప్రయాణ సౌకర్యం కల్పించే అంశంపై రాష్ట్ర ప్రభుత్వం కసరత్తు చేస్తున్నట్లు సమాచారం. ప్రస్తుతం మహాలక్ష్మి పథకం కింద మహిళలకు ఉచిత బస్సు ప్రయాణం అందుబాటులో ఉంది. ఇదే తరహాలో వృద్ధులకు కూడా ఉచిత ప్రయాణం కల్పించాలనే ఆలోచనలో ప్రభుత్వం ఉన్నట్లు తెలుస్తోంది. ఆంధ్రప్రదేశ్‌లో 60 ఏళ్లు దాటిన వారికి టికెట్‌ ధరపై 25 శాతం రాయితీ అమల్లో ఉండగా.. తెలంగాణలో మాత్రం పూర్తిగా ఉచిత ప్రయాణం కల్పించే అవకాశాన్ని పరిశీలిస్తున్నట్లు సమాచారం. అయితే ఇప్పటికే ఆర్టీసీపై ఉన్న ఆర్థిక భారం మరింత పెరిగే అవకాశం ఉందని నిపుణులు అభిప్రాయపడుతున్నారు.

అమెరికాలో జరిగిన ఘోర రోడ్డు ప్రమాదంలో తెలంగాణకు చెందిన 31 ఏళ్ల మహిళ దారం సుప్రియ మృతి చెందారు. మహబూబాబాద్ జిల్లా మరిపెడ మండలానికి చెందిన ఆమె ఉద్యోగరీత్యా మిస్సోరిలో నివసిస్తున్నారు. తెల్లవారుజామున కారులో ప్రయాణిస్తున్న సమయంలో వెనుక నుంచి వేగంగా వచ్చిన ట్రక్కు వాహనాన్ని బలంగా ఢీకొట్టింది. ప్రమాద తీవ్రతకు సుప్రియ అక్కడికక్కడే మృతి చెందారు. కారులో ఉన్న మరో భారతీయ యువతికి తీవ్ర గాయాలయ్యాయి. ఈ ఘటనతో మహబూబాబాద్‌లోని కుటుంబ సభ్యులు, బంధువులు విషాదంలో మునిగిపోయారు.

మూడు కార్పొరేషన్లలో ఏకరూప పాలన కోసం రూపొందించిన క్యూర్‌-2026 చట్టాన్ని అమల్లోకి తీసుకొస్తూ రాష్ట్ర ప్రభుత్వం గెజిట్‌ నోటిఫికేషన్‌ జారీ చేసింది. దీంతో జీహెచ్‌ఎంసీ, మల్కాజిగిరి, సైబరాబాద్‌ కార్పొరేషన్లలో భూవిలువ ఆధారిత ఆస్తిపన్ను విధానం అమల్లోకి రానుంది. 375 చదరపు అడుగుల్లోపు ఇళ్లకు ఏడాదికి రూ.101 పన్నుగా నిర్ణయించారు. కొత్త ఆస్తులకు ఏప్రిల్‌ 1 నుంచి విధానం వర్తించనుండగా.. పాత భవనాలకు 2027 ఏప్రిల్‌ 1 నుంచి కొత్త పద్ధతిలో పన్ను వసూలు చేయనున్నారు. అనధికార నిర్మాణాలకు 25 నుంచి 300 శాతం వరకు జరిమానా విధించనున్నారు.