ఎమ్మెల్సీ తీన్మార్ మల్లన్న వచ్చే అసెంబ్లీ ఎన్నికలపై కీలక ప్రకటన చేశారు. 2028 అసెంబ్లీ ఎన్నికల్లో ఆలేరు నుంచి ఎమ్మెల్యేగా పోటీ చేస్తానని వెల్లడించారు. మరోవైపు.. సెప్టెంబర్ 17 నుంచి రాష్ట్రవ్యాప్తంగా 14 వేల కిలోమీటర్ల పాదయాత్ర చేపడతామని తీన్మార్ మల్లన్న ప్రకటించారు. విద్య, వైద్యం కోసం 40 శాతం బడ్జెట్ కేటాయించాలని.. విద్యార్థులకు ఉచిత విద్య అందించాలని డిమాండ్ చేశారు. ఫీజు రీయింబర్స్‌మెంట్, స్కాలర్‌షిప్ బకాయిలపై అసెంబ్లీలో పోరాడతానని తెలిపారు.

మంత్రి కొండా సురేఖకు సంబంధించిన రాష్ట్రంలో పరిణామాలు తీవ్ర ఆసక్తిని రేపుతున్నాయి. కొండా సురేఖకు చెందిన పర్యావరణ, అటవీ శాఖలో డిప్యూటేషన్‌పై పనిచేస్తున్న అధికారుల డిప్యూటేషన్లను ప్రభుత్వం రద్దు చేసినట్లు తెలుస్తోంది. వారు పీసీసీఎఫ్‌ కార్యాలయంలో రిపోర్ట్ చేయాలని ఆదేశాలు జారీ చేసినట్లు సమాచారం. ఈ నిర్ణయం మంత్రి కొండా సురేఖకు ముందస్తు సమాచారం లేకుండానే జరిగిందన్న ప్రచారం ఇప్పుడు సచివాలయ వర్గాల్లో తీవ్ర చర్చకు దారితీసింది. దీనిపై అధికారిక ప్రకటన ఇంకా వెలువడలేదు.

మంత్రి కొండా సురేఖ, ఆమె కుమార్తె కొండా సుస్మిత వ్యాఖ్యలతో ఏర్పడిన వివాదంపై సీఎం రేవంత్‌రెడ్డి స్పందించారు. ఈ వ్యవహారం ప్రస్తుతం క్రమశిక్షణ కమిటీ పరిధిలో ఉందని.. కమిటీ అన్ని అంశాలను పరిశీలించి నిర్ణయం తీసుకుంటుందని స్పష్టం చేశారు. పార్టీ హైకమాండ్, క్రమశిక్షణ కమిటీ నిర్ణయాలకు నాయకులు, కార్యకర్త కట్టుబడి ఉండాల్సిందేనని తెలిపారు. పార్టీ అంతర్గత వ్యవహారాలను మీడియా ముందు చర్చించబోనని పేర్కొన్న సీఎం.. ఊహాజనిత కథనాలపై స్పందించబోనని స్పష్టం చేశారు.