తెలంగాణలో రెండో దశ మున్సిపల్‌ ఎన్నికలను డిసెంబరులో నిర్వహించే దిశగా ప్రభుత్వం యోచిస్తున్నట్లు సమాచారం. హైదరాబాద్‌, సైబరాబాద్‌, మల్కాజిగిరి కార్పొరేషన్లతోపాటు గతంలో ఎన్నికలు జరగని ఆరు మున్సిపాలిటీలకు ఎన్నికలు నిర్వహించే అవకాశం ఉంది. ప్రస్తుతం సర్‌ ప్రక్రియలో నిమగ్నమైన పురపాలక సిబ్బందికి అక్టోబరు తర్వాత విరామం ఇచ్చి డిసెంబరులో ఎన్నికలకు వెళ్లాలని ప్రభుత్వం భావిస్తున్నట్లు తెలుస్తోంది.

తెలంగాణ రీజినల్ రింగు రోడ్డు ఉత్తరభాగం టెండర్ల ప్రక్రియ మరోసారి వాయిదా పడింది. సంగారెడ్డి జిల్లా గిర్మాపూర్‌ నుంచి యాదాద్రి జిల్లా తంగడ్‌పల్లి వరకు 161.518 కిలోమీటర్ల ఆరు వరసల గ్రీన్‌ఫీల్డ్‌ ఎక్స్‌ప్రెస్‌వే నిర్మాణాన్ని రెండు ప్యాకేజీలుగా చేపట్టేందుకు ఎన్‌హెచ్‌ఏఐ టెండర్లు పిలిచింది. బిడ్‌ల గడువును పలుమార్లు పొడిగించిన అధికారులు తాజాగా సెప్టెంబరు 23 వరకు మరోసారి గడువు పెంచారు. ప్రాజెక్టుకు కేటాయింపులు, రహదారి నంబర్‌, కీలక అనుమతులు ఉన్నప్పటికీ టెండర్లలో జాప్యంపై రాష్ట్ర అధికారులు సందేహాలు వ్యక్తం చేస్తున్నారు.

ఆపరేషన్ సింధూర్ సమయంలో భారత ప్రభుత్వ వెబ్‌సైట్‌లపై సైబర్ దాడులకు పాల్పడిన కేసులో ఎన్‌ఐఏ సోదాలు చేపట్టింది. తెలంగాణలోని రామగుండంతో పాటు దేశవ్యాప్తంగా 5  ప్రాంతాల్లో సోదాలు నిర్వహించగా… కీలక ఆధారాలు స్వాధీనం చేసుకుంది.

Telangana Assembly Monsoon Session 2026 : తెలంగాణ శాసనసభ వర్షాకాల సమావేశాలు సెప్టెంబర్ 7 నుంచి ప్రారంభం కానున్నాయి. సచివాలయంలో మంత్రులు, ఎమ్మెల్యేలతో సమావేశమైన సీఎం రేవంత్ రెడ్డి.. సాగునీటి ప్రాజెక్టుల భూసేకరణను వేగవంతం చేయాలని ఆదేశించారు.

తెలంగాణలో ద్రోణి తరహా వాతావరణ పరిస్థితులు, నైరుతి రుతుపవనాల తేమ ప్రభావంతో ఆగస్టు నేడు, రేపు పలు ప్రాంతాల్లో వర్షాలు కురిసే అవకాశం ఉందని వాతావరణశాఖ అధికారులు చెబుతున్నారు. ఉత్తర తెలంగాణ జిల్లాల్లో తేలికపాటి నుంచి మోస్తరు వర్షాలతో పాటు అక్కడక్కడా భారీ వర్షాలు నమోదయ్యే సూచనలు ఉన్నాయన్నారు. నిజామాబాద్, జగిత్యాల, సిరిసిల్లలో ఇప్పటికే వర్షాలు కురుస్తుండగా.. కరీంనగర్‌కు విస్తరించే అవకాశం ఉందన్నారు. గంటకు 40–50 కిలోమీటర్ల వేగంతో గాలులు, ఉరుములు, మెరుపులు వచ్చే అవకాశం ఉండటంతో ప్రజలు అప్రమత్తంగా ఉండాలన్నారు.

Charlapalli Kakinada Special Trains : ప్రయాణికుల రద్దీని దృష్టిలో ఉంచుకొని చర్లపల్లి-కాకినాడ టౌన్ మధ్య ప్రత్యేక రైళ్లను నడుపుతున్నట్లు దక్షిణ మధ్య రైల్వే ప్రకటించింది. ఆగస్టు 27, 28 తేదీల్లో ఈ సర్వీసులు అందుబాటులో ఉంటాయి.