రూ.300 ప్రత్యేక ప్రవేశ దర్శన టోకెన్లపై టీటీడీ తాజాగా ఒక ప్రకటన ఇచ్చింది. నిమిషాల్లో టికెట్లు అయిపోతుండటంతో సర్వర్లు ఫెయిల్ అవుతున్నాయన్న సోషల్ మీడియాలో ప్రచారాన్ని తోసిపుచ్చింది. ఆన్‌లైన్ బుకింగ్ సిస్టమ్ మొత్తం ఆధునిక సాంకేతికతో నిర్వహిస్తున్నామని, నిరంతరం నిపుణులు పర్యవేక్షిస్తుంటారని పేర్కొంది. టికెట్లకు ఎక్కువ డిమాండ్ ఉండడంతో తొందరగా అయిపోతున్నాయని, దీనికి వర్చువల్ క్యూ పద్ధతిని అనుసరిస్తున్నట్టు తిరుమల తిరుపతి దేవస్థానం పేర్కొంది. టికెట్లు అయిపోవడం, ఆన్‌లైన్ బుకింగ్ వ్యవస్థ పనిచేయకపోవడం ఒకటిగా చూడొద్దని కోరింది.

పరవాడలో కాలుష్యంపై సోషల్ మీడియాలో వచ్చిన పోస్ట్‌ను చూసి ఏపీ డిప్యూటీ సీఎం పవన్ కళ్యాణ్ వెంటనే స్పందించారు. దానిపై విచారణ జరపాలని సంబంధిత అధికారులను ఆదేశించారు. దాంతో అధికారులు అనకాపల్లి జిల్లా పరవాడలో పారిశ్రామిక ప్రాంతంలో పర్యటించి, పరిస్థితలను పరిశీలించారు. అక్కడ శుద్ధి చేయని వ్యర్థాలతో కూడిన నీటిని కాలువల్లోకి విడుదల చేసినట్టు గుర్తించారు. వెంటనే దీనిపై వివరణ కోరుతూ 95 కంపెనీలకు నోటీసులు జారీ చేశారు. పైగా ఏడు రోజుల్లో సంతృప్తికరమైన వివరణ ఇవ్వాలని కోరారు.

ఏపీలో కూటమి ప్రభుత్వం పేదలకు ఇళ్ల పట్టాలు అందించే కార్యక్రమాన్ని చేపట్టింది. ఈ నెల 30వ తేదీన విజయవాడలో 24 వేల కుటుంబాలకు ఇళ్ల పట్టాలను అందించనుంది. దీనికి సంబంధించి అధికారులు ఏర్పాట్లు చేస్తున్నారు. కృష్ణా జిల్లా, ఎన్టీఆర్ జిల్లాలోని పలు కుటుంబాలకు ఈ లబ్ధి చేకూరనుంది. ఆ కుటుంబాలకు యాజమాన్య హక్కుతో పాటు బ్యాంకు లోన్ వచ్చే సదుపాయాన్ని కూడా కల్పించనున్నారు. కాగా ఇప్పటికే విశాఖపట్నంలో 28 వేల కుటుంబాలకు సీఎం చంద్రబాబునాయుడు ఇళ్ల పట్టాలు అందించిన సంగతి తెలిసిందే.