జీవో నంబర్ 97ను వ్యతిరేకిస్తూ ఆగస్టు 25న రాష్ట్రవ్యాప్తంగా పాలిటెక్నిక్ కాలేజీల బంద్‌కు ఏబీవీపీ పిలుపునిచ్చింది. పాలిటెక్నిక్‌లను యంగ్ ఇండియా స్కిల్స్ యూనివర్సిటీ పరిధిలోకి తీసుకురావడంపై విద్యార్థులు, అధ్యాపకుల్లో ఆందోళన ఉందని ఏబీవీపీ తెలిపింది. ఈసెట్ లేటరల్ ఎంట్రీ, ఫీజు రీయింబర్స్‌మెంట్, పాఠ్య ప్రణాళిక, ప్రవేశాలు, సర్టిఫికెట్లు, ఉద్యోగ అవకాశాలపై స్పష్టత కావాలని డిమాండ్ చేసింది. ఈ బంద్‌కు విద్యార్థులు, తల్లిదండ్రులు, అధ్యాపకులు మద్దతు ఇవ్వాలని పిలుపునిచ్చింది.

తెలంగాణలో పోలీస్ ఉద్యోగ ఆశావహుల కోసం T-SAT ప్రత్యేక తరగతులను అందించనుంది. ఆగస్టు 24 నుంచే క్లాసులు జరుగుతున్నాయి. అభ్యర్థులు దీనిని సద్వినియోగం చేసుకోవాలని అధికారులు విజ్ఞప్తి చేశారు.

సన్న వడ్లకు ప్రభుత్వం ప్రకటించిన బోనస్‌ దళారుల చేతుల్లోకి వెళ్లకుండా అధికారులు పంటను దశలవారీగా ట్రాక్‌ చేస్తున్నారు. విత్తనాలు కొనుగోలు చేసే సమయంలోనే అన్నదాతల పట్టాదారు పాసుపుస్తకం, విత్తన రకం, సర్వే నంబర్‌ వివరాలను నమోదు చేస్తున్నారు. డిజిటల్‌ క్రాప్‌ సర్వేలోనూ పంట వివరాలను పొందుపరుస్తున్నారు. ఇతర ప్రాంతాల నుంచి విత్తనాలు లేదా నారు తెచ్చుకునే రైతుల నుంచి సెల్ఫ్‌ డిక్లరేషన్‌ తీసుకుంటున్నారు. ఈ వివరాలను సివిల్‌ సప్లయ్స్‌ శాఖ క్రాస్‌చెక్‌ చేసిన తర్వాతే ఏడు సన్న రకాలకు బోనస్‌ అందించనున్నారు.

తెలంగాణ మద్యం మార్కెట్లోకి 18 ప్రముఖ సరఫరా సంస్థలకు చెందిన 121 కొత్త బ్రాండ్లు ప్రవేశించేందుకు రెడీ అవుతున్నాయి. గ్లెన్‌ఫిడిక్‌, ది మెకాలన్‌ సింగిల్‌ మాల్ట్‌లు, లూయిస్‌ థర్టిన్‌ కాగ్నాక్‌, మంకీ షోల్డర్‌, హెండ్రిక్స్‌ జిన్‌, టైగర్‌ లాగర్‌ వంటి ఇంటర్నేషనల్ బ్రాండ్లతోపాటు దేశీయ ప్రీమియం ఉత్పత్తులు జాబితాలో ఉన్నాయి. పారదర్శకత కోసం బ్రాండ్ల వివరాలు, కంపెనీలు సమర్పించిన పత్రాలను టీజీబీసీఎల్‌ వెబ్‌సైట్‌లో అందుబాటులో ఉంచారు. ట్రేడ్‌మార్క్‌ లేదా ఇతర అభ్యంతరాలను సెప్టెంబర్‌ 1లోపు సమర్పించేందుకు అవకాశం కల్పించారు.