ప్రముఖ కవి సుద్దాల అశోక్ తేజకు తెలంగాణ తెలుగు తేజం సాహిత్య పురస్కారం-2026 లభించనుంది. తెలుగు భాషా సంరక్షణ సంఘం-తెలంగాణ సాహితీ సంస్థ ఏటా అందజేస్తున్న బుర్ర నర్సమ్మ-లింగారెడ్డి స్మారక రాష్ట్ర స్థాయి పురస్కారానికి ఈసారి ఆయన ఎంపికయ్యారు. ఈ నెల 22న కరీంనగర్‌లో జరిగే కార్యక్రమంలో సుద్దాల అశోక్ తేజకు ఈ పురస్కారాన్ని ప్రదానం చేయనున్నారు. తెలుగు భాషకు తెలంగాణ మట్టిబిడ్డలు అందించిన సేవలను గుర్తించడమే ఈ పురస్కారం ఉద్దేశమని నిర్వాహకులు తెలిపారు.

తెలంగాణలో 2026–27 విద్యా సంవత్సరానికి ఎంబీబీఎస్‌ సీట్లు భారీగా పెరిగాయి. కొత్తగా 1,010 సీట్లు అందుబాటులోకి రావడంతో రాష్ట్రంలోని 66 మెడికల్‌ కాలేజీల్లో మొత్తం సీట్ల సంఖ్య 10,450కి చేరింది. ఇందులో ప్రభుత్వ కాలేజీల్లో 4,400, ప్రైవేట్‌ కాలేజీల్లో 6,050 సీట్లు ఉన్నాయి. కొత్త సీట్ల పెంపులో ప్రైవేట్‌ కాలేజీల వాటా ఎక్కువగా ఉంది. దేశవ్యాప్తంగా 1,40,214 ఎంబీబీఎస్‌ సీట్లు ఉండగా.. అత్యధిక సీట్లున్న రాష్ట్రాల్లో తెలంగాణ ఐదో స్థానంలో నిలిచింది. అనుమతించిన సీట్లకు మించి అడ్మిషన్లు ఇస్తే కఠిన చర్యలు ఉంటాయని ఎన్‌ఎంసీ హెచ్చరించింది.

దక్షిణ ఒడిశా తీరంలో ఏర్పడిన అల్పపీడనం ప్రభావంతో తెలంగాణలో వర్షాలు పడుతున్నాయి. సెప్టెంబర్‌ 12, 13 తేదీల్లో వర్షాల తీవ్రత గరిష్ఠంగా ఉండే అవకాశం ఉందని వాతావరణశాఖ నిపుణులు వెల్లడించారు. ఉత్తర, తూర్పు తెలంగాణ జిల్లాల్లో మోస్తరు నుంచి భారీ వర్షాలతో పాటు ఉరుములు, మెరుపులు సంభవించనున్నాయన్నారు. ఆదిలాబాద్‌, ఆసిఫాబాద్‌, నిర్మల్‌, మంచిర్యాల, జగిత్యాల, నిజామాబాద్‌, పెద్దపల్లి, భూపాలపల్లి తదితర జిల్లాల్లో విస్తృత వర్షాలు కురిసే సూచనలు ఉన్నాయన్నారు. హైదరాబాద్‌లో ఒకట్రెండు విడతలుగా మోస్తరు వర్షాలు పడే అవకాశం ఉండగా, దక్షిణ తెలంగాణలో ప్రభావం తక్కువగా ఉండనుందని చెప్పారు.

తెలంగాణలో అమృత్‌ భారత్‌ పథకం కింద రైల్వే స్టేషన్ల పునరాభివృద్ధి పనులు వేగంగా సాగుతున్నాయి. రామగుండం, జనగామ, మహబూబాబాద్‌, బాలబ్రహ్మేశ్వర జోగులాంబ స్టేషన్లలో పనులు 99 శాతం పూర్తయ్యాయి. నల్గొండ, మల్కాజిగిరి, యాకుత్‌పుర, వికారాబాద్‌ తదితర స్టేషన్లలోనూ పనులు దాదాపు పూర్తయ్యాయి. సోలార్‌ విద్యుత్‌, ఈవీ ఛార్జింగ్‌ కేంద్రాలు, లిఫ్టులు, ఎస్కలేటర్లు, ఆధునిక వెయిటింగ్‌ హాళ్లు అందుబాటులోకి రానున్నాయి. రూ.714.73 కోట్లతో సికింద్రాబాద్‌ స్టేషన్‌ను మల్టీమోడల్‌ ట్రాన్స్‌పోర్ట్‌ హబ్‌గా అభివృద్ధి చేస్తున్నారు.