క్యారెట్స్ ఆరోగ్యానికి మేలు చేసే కూరగాయల్లో ఒకటి. కొందరు వీటిని పచ్చిగా తినడానికి ఇష్టపడితే.. మరికొందరు ఉడికించుకుని సలాడ్స్, కూరలు, జ్యూసుల రూపంలో తీసుకోవడానికి ఇష్టపడతారు. క్యారెట్లు శరీరానికి మేలు చేసే ఎన్నో పోషకాలు ఉన్నాయి. అయితే, చాలా మందికి ఓ సందేహం ఉంటుంది. బీటా-కెరోటిన్తో పాటు మిగతా పోషకాలు పచ్చి క్యారెట్ల నుంచా లేక ఉడికించిన క్యారెట్ల నుంచా ఎక్కువగా శరీరానికి అందేది? దీనిపై ఫుల్ క్లారిటీ ఇచ్చారు చీఫ్ క్లినికల్ న్యూట్రిషనిస్ట్ ఎడ్వినా రాజ్ (హెడ్ ఆఫ్ సర్వీసెస్ – క్లినికల్ న్యూట్రిషన్ & డైటెటిక్స్, ఆస్టర్ సిఎమ్ఐ హాస్పిటల్, బెంగళూరు).
పచ్చి క్యారెట్ల కంటే తేలికగా ఉడికించిన క్యారెట్ల నుంచే ‘బీటా-కెరోటిన్’ శరీరానికి చాలా మెరుగ్గా అందుతుందని ఆమె తెలిపారు. క్యారెట్ను వండినప్పుడు దాని కణ నిర్మాణం మెత్తబడి, బీటా-కెరోటిన్ సులభంగా విడుదలై జీర్ణవ్యవస్థలో త్వరగా శోషించబడుతుంది.అయితే పచ్చి క్యారెట్లు మంచివి కావు అని దీని అర్థం కాదు. వాటిలో ఫైబర్, విటమిన్లు, ఇతర సహజ గుణాలు పుష్కలంగా ఉంటాయి. ఎక్కువ ఉష్ణోగ్రత వద్ద లేదా ఎక్కువసేపు ఉడికిస్తే కొన్ని సున్నితమైన పోషకాలు నశిస్తాయి. కాబట్టి రోజువారీ ఆహారంలో పచ్చివి, తేలికగా ఉడికించినవి రెండూ ఉండేలా చూసుకోవడం మంచిదని తెలిపారు. దీంతో పాటు క్యారెట్ వినియోగంపై ఉన్న అనేక సందేహలకు సమాధానాలు ఇచ్చారు న్యూట్రిషనిస్ట్.
