ఆర్టీసీలో భారీగా ఉద్యోగాల భర్తీ.. త్వరలో 4,538 పోస్టులు.. మంత్రి పొన్నం కీలక ప్రకటన

టీజీఎస్‌ఆర్టీసీలో సిబ్బంది కొరత, ఉద్యోగులపై పెరుగుతున్న పనిభారాన్ని తగ్గించేందుకు రాష్ట్ర ప్రభుత్వం చర్యలు చేపడుతోంది. ఇందులో భాగంగా 4,538 పోస్టుల భర్తీ ప్రక్రియను త్వరలో పూర్తి చేయనున్నట్లు రవాణా శాఖ మంత్రి పొన్నం ప్రభాకర్‌ తెలిపారు. ఆర్టీసీ ఉద్యోగులకు ప్రతి నెలా ఒకటో తేదీన జీతాలు అందుతున్నాయని పేర్కొన్నారు. 2017 పీఆర్‌సీ, డీఏ బకాయిలతో పాటు 2013 నుంచి పెండింగ్‌లో ఉన్న బాండ్లను క్లియర్‌ చేసినట్లు చెప్పారు. 1,134 కారుణ్య నియామకాలతో పాటు గతంలో తొలగించిన సుమారు 250 మంది ఉద్యోగులను తిరిగి విధుల్లోకి తీసుకున్నట్లు తెలిపారు.