జన్వాడ ఫామ్‌హౌస్ వ్యవహారంపై దాని యజమానిగా పేర్కొంటున్న ప్రదీప్‌రెడ్డి స్పందించారు. ఫామ్‌హౌస్ ఉన్న భూమి తన సొంతమని.. కేటీఆర్ తనకు చిన్ననాటి స్నేహితుడని తెలిపారు. 2019లో ప్రాపర్టీని కొనుగోలు చేసి కేటీఆర్‌కు లీజుకు ఇచ్చినట్లు చెప్పారు. భూమికి సంబంధించి ఎలాంటి వివాదాలు లేవని, చట్టబద్ధమైన పత్రాలు ఉన్నాయని ఆయన పేర్కొన్నారు. ప్రభుత్వానికి ఏవైనా సందేహాలు ఉంటే నోటీసులు జారీ చేసి వివరణ కోరవచ్చని, అవసరమైన పత్రాలను అందించేందుకు సిద్ధంగా ఉన్నానని చెప్పారు. అయితే రాజకీయ నేతలు వ్యక్తిగత ఆస్తిని పరిశీలించేందుకు రావడం సరికాదని వ్యాఖ్యానించారు.

తెలంగాణ ఆర్టీసీలో గుర్తింపు సంఘం ఎన్నికలకు ఎట్టకేలకు షెడ్యూల్ విడుదలైంది. దాదాపు 10 ఏళ్ల విరామం తర్వాత జరుగుతున్న ఈ ఎన్నికల ప్రక్రియ ఈనెల 21 నుంచి ప్రారంభం కానుంది. అక్టోబర్ 9న పోలింగ్ నిర్వహించి.. అక్టోబర్ 14, 15 తేదీల్లో పోస్టల్ బ్యాలెట్ ప్రక్రియ జరగనుండగా.. అక్టోబర్ 17న ఓట్ల లెక్కింపు, ఫలితాలు ప్రకటించనున్నారు. ఎన్నికల్లో మెజారిటీ సాధించిన సంఘానికి గుర్తింపు లభిస్తుంది. కార్మికుల వేతనాలు, బోనస్, డీఏ, సర్వీస్ నిబంధనలు వంటి అంశాలపై యాజమాన్యం, ప్రభుత్వంతో చర్చించే హక్కు గుర్తింపు సంఘానికే ఉండటంతో ఈ ఎన్నికలు ప్రాధాన్యం సంతరించుకున్నాయి.