జెర్రులు అదేనండీ కాళ్ళ జెర్రులు వల్ల ఇంటికి పెద్దగా నష్టం కలిగించకపోయినా, ఇంట్లో అవి అకస్మాత్తుగా కనిపిస్తే తీవ్రమైన అసహ్యం, భయం కలగడం సహజం. వాతావరణం మారినప్పుడు లేదా వేడి పెరిగినప్పుడు ఇవి ఆశ్రయం కోసం నివాసాల వైపు వస్తుంటాయి. చూడ్డానికి భయంకరంగా ఉన్నప్పటికీ, జీవావరణం పరంగా జెర్రులు ఒక రకమైన సహజ పెస్ట్ కంట్రోల్ ఏజెంట్లు. ఇవి మనుషులకు వ్యాధులను వ్యాపింపజేసే క్రిములు కావు.
పైగా ఇళ్లలో డెంగ్యూ, మలేరియా కలిగించే దోమలు, నల్లులు, చెదపురుగులు, బొద్దింకలను వేటాడి తిని వాటి సంఖ్యను నియంత్రిస్తాయి. జెర్రీ కుట్టినప్పుడు సాధారణంగా తీవ్రమైన నొప్పి, చర్మం ఎర్రబడటం, తేనెటీగ లేదా తేలు కుట్టినట్లుగా వాపు రావచ్చు. అయినప్పటికీ భద్రత దృష్ట్యా ఇంట్లోకి రాకుండా చూసుకోవడమే శ్రేయస్కరం. అసలు ఇవి ఇంట్లోకి ఎందుకు వస్తాయి, రాకుండా ఆపడానికి పాటించాల్సిన చిట్కాలేంటో ఇప్పుడు తెలుసుకుందాం.
