తీవ్రమైన అనారోగ్య సమస్య నుంచి ఉపశమనం పొందడానికి దాదాపు ఐదేళ్లపాటు ఒక చెరువులో గడిపి, ప్రత్యేక చికిత్స కోసం ముంబైకి తరలించబడిన 16 ఏళ్ల ఇక్బాల్ షేక్ కథ.. అరుదైన వ్యాధులు, ఆలస్యంగా జరిగే రోగ నిర్ధారణపై దేశవ్యాప్తంగా చర్చను రేకెత్తించింది. ఇక్బాల్ కథ అసాధారణమైంది అయినప్పటికీ, ఇది ఒక పెద్ద ఆరోగ్య సంరక్షణ సమస్యను కూడా ఎత్తి చూపుతుంది. ముఖ్యంగా పిల్లల్లో వచ్చే అరుదైన వ్యాధులను (Rare Diseases) ప్రాథమిక దశలోనే గుర్తించడం చాలా కష్టమైన విషయం.
ఎందుకంటే, వాటి ప్రారంభ లక్షణాలు పిల్లల్లో సాధారణంగా వచ్చే చిన్న చిన్న ఆరోగ్య సమస్యల మాదిరిగానే ఉంటాయి. చిన్న సమస్య కనిపించిన వెంటనే తల్లిదండ్రులు ఆందోళన చెందాల్సిన అవసరం లేదు. కానీ ఆ లక్షణాలు ఎక్కువ కాలం తగ్గకుండా ఉండటం, అసాధారణంగా కనిపించడం, లేదా ఒకదానితో ఒకటి కలిసి రావడం వంటి పరిస్థితులను నిశితంగా గమనించాలి. పిల్లల్లో అరుదైన వ్యాధుల్ని గుర్తించడం ఎలా అనే దాని గురించి పూర్తి వివరాల్ని అందించారు డాక్టర్ రాధాకృష్ణ హెగ్డే ఎస్ (హెచ్.ఓ.డి అండ్ ప్రధాన కన్సల్టెంట్ – పీడియాట్రిక్స్, ఆస్టర్ ఉమెన్ అండ్ చిల్డ్రన్ హాస్పిటల్స్, బెంగళూరు).
