ఓపెన్ టాప్ డబుల్ డెక్కర్ బస్సులు మళ్లీ వచ్చేస్తున్నాయ్.. హైదరాబాద్ సిటీ టూరిస్ట్ స్పాట్‌లు చుట్టేయొచ్చు..!

హైదరాబాద్‌ నగర పర్యాటకులకు త్వరలో ఓపెన్‌ టాప్‌ ఎలక్ట్రిక్‌ డబుల్‌ డెక్కర్‌ బస్సులు అందుబాటులోకి రానున్నాయి. తెలంగాణ టూరిజం డెవలప్‌మెంట్‌ కార్పొరేషన్‌ కొత్త బస్సులను సమకూర్చుకునేందుకు ప్రతిపాదనలు ఆహ్వానించింది. బస్సులోని పైఅంతస్తు పూర్తిగా ఓపెన్‌గా.. కింది డెక్‌ ఏసీ సౌకర్యంతో ఉండేలా వీటిని రూపొందించనున్నారు. మరోవైపు హెచ్ఎండీఏ వద్ద ఉన్న 6 ఎలక్ట్రిక్‌ డబుల్‌ డెక్కర్‌ బస్సులను కూడా టూరిజం శాఖ పరిధిలోకి తీసుకొచ్చి నగరంలోని ప్రముఖ పర్యాటక ప్రాంతాల్లో నడిపే యోచన ఉంది. దీంతో పాత డబుల్‌ డెక్కర్‌ జ్ఞాపకాలకు ఆధునిక టూరిజం రూపం రానుంది.