అమెరికా వీసాల కోసం దరఖాస్తు చేసుకునే భారతీయ పౌరులకు ఆయా నగరాల కాన్సులేట్లలో వెయిటింగ్ పీరియడ్ వేర్వేరుగా ఉంది. హైదరాబాద్, ముంబై, న్యూఢిల్లీ, చెన్నై, కోల్కతా నగరాల్లో పర్యాటక, విద్యార్థి, ఉద్యోగ వీసాలకు పడుతున్న సమయంపై ప్రత్యేక కథనం.
అమెరికా వెళ్లాలనుకునే భారతీయులకు వీసా అపాయింట్మెంట్ దొరకడం ఇప్పటికీ పెద్ద ప్రయాసగానే మారింది. అమెరికా విదేశాంగ శాఖ (US State Department) నవీకరించిన తాజా గణాంకాల ప్రకారం.. కాన్సులేట్ ఉన్న నగరం, దరఖాస్తు చేసుకునే వీసా కేటగిరీని బట్టి వెయిటింగ్ టైమ్లో తీవ్ర వ్యత్యాసాలు కనిపిస్తున్నాయి. భారత్లోని చెన్నై, హైదరాబాద్, కోల్కతా, ముంబై, న్యూఢిల్లీల్లో ఉన్న యూఎస్ కాన్సులేట్లలో వివిధ రకాల వీసాలకు ఎంత సమయం పడుతుందో స్పష్టం చేశారు.
బి1/బి2 వీసాలకు భారీగా జాప్యం
వ్యాపార, పర్యాటక పర్యటనల కోసం దరఖాస్తు చేసుకునే బి1/బి2 (B1/B2) వీసాలకు అత్యధికంగా వేచి చూడాల్సి వస్తోంది. మూడేళ్లకు పైగా అపాయింట్మెంట్ దొరకని పరిస్థితి నుంచి కొంత మెరుగుపడినప్పటికీ, ఇప్పటికీ కొన్ని నగరాల్లో సుదీర్ఘ నిరీక్షణ తప్పడం లేదు.
మూడు నెలల కంటే ఎక్కువ వెయిటింగ్ పీరియడ్ ఉన్న నగరాల వివరాలు:
- హైదరాబాద్: 11.5 నెలలు
- ముంబై: 11 నెలలు
- న్యూఢిల్లీ: 7.5 నెలలు
- చెన్నై: 7 నెలలు
- కోల్కతా: 6 నెలలు
అంటే హైదరాబాద్, ముంబై కాన్సులేట్లలో పర్యాటక వీసా అపాయింట్మెంట్ దొరకాలంటే దాదాపు ఏడాది పాటు వేచి చూడాల్సిందే.
విద్యార్థి వీసాలకు పెద్ద ఊరట
అమెరికాలో ఉన్నత విద్యనభ్యసించేందుకు, ఎక్స్ఛేంజ్ ప్రోగ్రామ్ల కోసం వెళ్లే అభ్యర్థులకు (F, M, J కేటగిరీలు) వెయిటింగ్ టైమ్ చాలా తక్కువగా ఉండటం ఊరటనిచ్చే అంశం.
- చెన్నై: 15 రోజుల లోపు
- హైదరాబాద్: 1.5 నెలలు
- కోల్కతా: 2 నెలలు
- న్యూఢిల్లీ: 2 నెలలు
- ముంబై: 2.5 నెలలు
ఒకే కాన్సులేట్లో దరఖాస్తు చేసుకున్నా వీసా కేటగిరీని బట్టి ఈ వెయిటింగ్ టైమ్లో ఎంతో వ్యత్యాసం ఉంటుందని ఈ గణాంకాలు చెబుతున్నాయి.
హెచ్-1బీ, ఉద్యోగ వీసాల పరిస్థితి
హెచ్-1బీ, ఎల్-1 సహా ఇతర పిటిషన్ ఆధారిత ఉద్యోగ వీసాలకు (H, L, O, P, Q) సంబంధించి కాన్సులేట్ల వారీగా అపాయింట్మెంట్ సమయాలు ఇలా ఉన్నాయి.
- హైదరాబాద్: 5.5 నెలలు (భారత్లోనే అత్యధికం)
- న్యూఢిల్లీ: 3 నెలలు
- చెన్నై: 1.5 నెలలు
- ముంబై: 1.5 నెలలు
- కోల్కతా: 1 నెల
ముందస్తుగా స్లాట్ పొందే అవకాశం ఉందా?
యూఎస్ విదేశాంగ శాఖ ప్రచురించే ఈ వెయిటింగ్ వివరాలు ప్రతి నెలా మారుతుంటాయి. ఇక్కడ పేర్కొన్న సమయంలోనే ఖచ్చితంగా అపాయింట్మెంట్ లభిస్తుందని గ్యారెంటీ ఉండదు. కాన్సులేట్లు ఎప్పటికప్పుడు అదనపు స్లాట్లను అందుబాటులోకి తెస్తుంటాయి. ఇప్పటికే అపాయింట్మెంట్ బుక్ చేసుకున్న అభ్యర్థులు అధికారిక పోర్టల్లో లాగిన్ అయి, స్లాట్ల లభ్యతను బట్టి తమ అపాయింట్మెంట్ను ముందస్తు తేదీకి మార్చుకోవచ్చని అధికారులు సూచిస్తున్నారు.
