ఈనెల 14న రామగుండంలో బీఆర్ఎస్ భారీ బహిరంగ సభ.. ముఖ్య అతిథిగా కేటీఆర్

సింగరేణి కార్మికుల సమస్యలను రాజకీయ వేదికపై ప్రధానంగా ప్రస్తావించేందుకు బీఆర్‌ఎస్‌ కార్యాచరణకు సిద్ధమైంది. లాభాల్లో కార్మికుల వాటా, డిపెండెంట్‌ ఉద్యోగాలు, మెడికల్‌ బోర్డులు, గుర్తింపు యూనియన్‌ ఎన్నికలు, పెండింగ్‌ బకాయిల చెల్లింపు వంటి అంశాలను సభలో ప్రధానంగా లేవనెత్తనుంది. కార్మికుల ఇళ్ల హక్కులు, సింగరేణి భవిష్యత్తు, సంస్థ పనితీరుపైనా చర్చకు అవకాశం ఉంది. బొగ్గు ఉత్పత్తి తగ్గుదలపై హరీశ్‌రావు చేసిన ఆరోపణలకు సభ వేదికగా మరింత వివరణ ఇచ్చే అవకాశం కనిపిస్తోంది. అక్టోబర్‌ 14న రామగుండంలో జరగనున్న ఈ కార్యక్రమానికి కేటీఆర్‌ హాజరవుతుండటంతో సింగరేణి ప్రాంత రాజకీయాల్లో సభకు ప్రాధాన్యం ఏర్పడింది.